Brudavolltunet har universell tilkomst til administrasjonsbygget og HC toalett.

Dei antikvariske bygningane i tunet er ikkje universelt tilgjengelege.

Eldste delen av bygningane er frå 1600-talet. Hageanlegget vart etablert kring 1830, og var til inspirasjon for hagedyrkinga i distriktet som tok til utover 1800-talet.

Brudavollen vart truleg busett på slutten av 1500-talet, etter å ha lege aude lenge. På 1600-talet vart garden teken av skred og husa sette opp att på ein ny stad. Dagens tun er bygd tidleg på 1800-talet.

Garden var ei tid av dei største i gamle Ørsta. Før som no har folk vore nøydde til å søkje andre levevegar eller nye stader for å livberge seg. Banda mellom heimegarden og dei utflytte var ofte solide, og impulsane utanfrå gjorde at folket på Brudavollen følgde godt med i samfunnsutviklinga. Frå Brudavollen kom mellom anna den første sunnmøringen som vart nordamerikanar for godt, og den første jordmora i gamle Ørsta kommune.

Brudavollhagen vart opparbeidd av Nils Torkelson Brudevold, truleg i 1830-åra. Det skal vere ein av dei første hagane i Ørsta som er knytt til ein gard.

Brudavolltunet har tilknytt eit moderne administrasjonsbygg med kjøken, internett og selskapslokale som er til utleige.

For formidling og formidlingsopplegg for grupper, barnehagar og skular, ta kontakt med museumspedagog Jan Kåre Blindheim jan-kare@vitimusea.no