Brudavollslekta

Same slekta har vore eigarar av Brudavollen frå etableringa og fram til1963. Mange flytte ut og etablerte seg andre stadar i Norge og utlandet. Det er mange på Sunnmøre som har røtene sine frå denne garden.

Torkel Nilsson Brudevoll (1778-1860) bygde opp tunet slik det om lag står no. Han var ein mann av opplysingstida og likte å lese både bøker og aviser. Han bygde opp den svært moderne driftsbygninga, truleg den fyrste i område.

Sonen hans, Nils Torkelson, tok over garden i 1831 og opparbeidde blant anna hagen nedanfor Kårstova. Nils hadde mange interesser utover gardsdrifta. Han var både bokbindar og hattemakar. Ofte reiste han austover for å selje varene sine, og tok då heim ulike planter og tre som fekk sin plass i tun og hage. Noko av vekstane selde han vidare.

Nils fekk to døtrer. Ei av desse, Ingeborg, gifte seg med Ola Ivarson Barstad. Han sette opp buda i 1853 og drog på plass den store steinhella i tunet.

Ola og Ingeborg tok over som brukarar i 1857. Dei fekk 10 born. Av desse var fire gutar, men ingen av dei hadde særleg interesse for gardsdrifta. Andreas Olai, nest yngste sonen, tok i 1900 på seg ansvaret for garden og mora, som var blitt enkje.

Olai, som han vart kalla, og kona Anne, fekk fem born. Ingen av desse var særleg lystne på å drive garden, men den nest eldste, Odd Elias, tok til slutt over. Da han døydde utan arvingar i 1963, vart garden overteken av Ørsta Bygdemuseumslag.