Tekstilsamlinga

Den omfattar ein variasjon av både vevde tekstilar til husbruk og gangkle til folk. Tekstilane er datert frå folkedrakttida, via 1800-tallet og til førkrigsåra.

Folkedraktplagga består blant anna av ei verkeleg fin samling dåpshuer, flotte ermeliv, samt stakkar, understakkar, lause lommer, brudgomselar og vakre sjal.

Frå 1800-tallet utmerkar det seg ei nydeleg samling småbarnskle, frå undertøy som skjorter og strikka strømper til kjolar og ørsmå pulsvantar med perlebroderi.

Brudavolltunet har også ei fin bunadssamling frå tidleg og fram mot midten av 1900-talet. Samlinga blei i 2023 supplert med heile 38 mønsterteikningar knytt til det omfattande arbeidet nokre kvinner frå Ørsta gjorde for å skape ein eigen bunad i 1940-åra.

Tekstilsamlinga blir forvalta lokalt på Brudavolltunet av Viti sine fagfolk, og blir registrert og digitalisert før publikum etter kvart kan sjå den på Digitalt Museum.