Lag seljefløyte

Våren er også tida for å lage seljefløyte – når blada på selja sprett fram og seljesafta går mellom barken og veden. På Sunnmøre skjer dette gjerne i mai månad.

Seljetreet er det treet med "gåsungar" på. Om du ikkje finn eit seljetre, kan du også prøve deg med grein frå eit rognetre.

SLIK GJER DU DET

Finn ei glatt seljegrein og kutt kvisten av i den eine enden.
I den andre enden spikkar du eit skrått munnstykke. Tuppen heilt ytst kuttar du rett av.
Lag eit spor i barken rundt pinnen ovanfor der du skal ha lydholet.
Lag lydhol på oversida av fløyta, nær munnstykket. Du må skjere gjennom barken litt ned i veden.
Løsne barken. Legg fløyta på låret og bank varsamt med knivskaftet rundt heile barken. Ifølgje erfarne fløytespikkarar hjelper det på å seie «Tvitt, tvitt, vil du gå så skal du få ei skive med sukker på".
Trekk av barken. No har du ei fløyte, der halvparten er utan bark.
Lag klangrom. Der du laga lydholet i barken og litt ned i veden, skjer du no eit ganske djupt rom.
Frå klangrommet og til spissen av munnstykket skjer du av ei tynn flis. Gjennom denne skal lufta pressast når du blæs. Sett på barken igjen.
Blir det ikkje god nok lyd, kan du spikke litt meir av klangrommet.

Lykke til!