Forfattar: Signe Elvik Svoen, konservator

Denne artikkelen er ein del av vår «Rettleiar for jugendstilarkitektur». Rettleiaren består av fleire delar, og denne artikkelen høyrer til «Tilrådingar for arbeid på jugendstilhus». Alle delane inneheld verdfull informasjon for dei som arbeider med eller eig jugendstilarkitektur. Du bør lese alle delane for å få best mogleg utbyte.

Les meir om våre tilrådingar for val av handverkar ved å bla deg vidare nedover, eller undersøk andre tema i rettleiaren vår ved å nytte linkane nedanfor.

Val av handverkar

Handverkarar som har særlege kunnskapar om og erfaring med eldre bygningar og byggjemetodar, vil vurdere ein bygning annleis enn handverkarar utan slik bakgrunn. Erfaring og spesialkunnskap kan vere avgjerande for å finne gode løysingar. Den rette handverkaren kan finne løysingar som tek både antikvariske, tekniske og praktiske omsyn.

Kjennskap til eldre bygningar og byggjesystem

Gamle og nye byggjesystem kan vere grunnleggande forskjellige. Feil bruk av moderne metodar og materiale i eldre bygningar kan resultere i store skadar på bygningen. Ein må derfor nytte ein handverkar som har kjennskap til korleis eldre bygningar fungerer, slik at ein kan vite kva for løysingar ein bør nytte.

Dersom du er usikker på om handverkaren du ønskjer å bruke, har den nødvendige erfaringa, kan du be om å få referansar på liknande prosjekt som handverkaren har vore ansvarleg for.

Økonomi i eit lengre perspektiv

Ein annan viktig faktor er økonomi. I dag blir ofte moderne, standardiserte løysingar framstilte som billigare. I realiteten kan ein risikere å ende opp med løysingar som fungerer dårlegare over tid og gir meirkostnader seinare.

Når ein skal gjere arbeid på eldre bygningar, er det derfor viktig å vurdere økonomien i eit lengre perspektiv. Spesialiserte handverkarar kan koste meir her og no, men dei kan gi deg tilpassa og meir haldbare løysingar, som fungerer betre både for deg sjølv og for bygningen.

Ikkje alle tiltak på ein gammal bygning treng spesialkunnskap. I nokre tilfelle kan det vere praktisk og kostnadssparande å berre hyre inn éin handverkar eller eitt firma til alt. I andre tilfelle er det betre å dele opp arbeidet etter kva slags kompetanse ein treng.

Dersom du er usikker på kva som er den beste framgangsmåten for ditt prosjekt, er det lurt å kontakte eit lokalt bygningsvernsenter eller fagmiljø og be om råd.