Forenkling

Sofa med systemputer

Treseter sofa med systemputer frå Standal Møbelfabrikk i Ålesund, 1950-åra. Med slike puter kunne ein slite stoffet på to sider, noko som gav sofaen eit lengre liv.

Det var arbeidskrevjande å lage sofasete med lause stålfjører. Stålfjørene vart festa på gjordband og surra saman med hampetau. Over fjørene vart det lagt jutestrie og fleire lag med stopping, før alt vart dekt med trekk i stoff eller hud. Framsteget kom då dei laga eit putesystem med korte spiralfjører med toppdekke av ullvadd. Møbelbedrifta K.Emdal & co i Straumgjerde var ein viktig leverandør av slike systemputer. Ei anna sykkylvsbedrift, Alfred Nyborg, utvikla ei maskin som gjorde det mogleg å få stofftrekket enkelt på.