Nasjonalt nettverksseminar

Onsdag 3. og torsdag 4. juni er det Nasjonalt nettverksseminar om teknologi- og industrihistorie i Ålesund og Sykkylven. Tema for samlinga er: Korleis kan vi formidle og ta vare på industrihistoria?

Fagfolk frå norske museum og andre bevaringsinstitusjonar samlast i to dagar med fokus på den industrielle historia i regionen.

Seminaret blir arrangert av Nettverk for teknologi- og industrihistorie, leia av Norsk Teknisk Museum, i samarbeid med Viti. Målet er å styrkje samarbeidet, dele kunnskap og leggje grunnlaget for nye prosjekt innan bevaring og formidling av teknologi- og industrihistorie.

Lokale og nasjonale problemstillingar
Fyrste dag (4. juni) går føre seg på Fiskerimuseet i Ålesund. Her blir det innlegg frå mellom andre Viti, IKA Møre og Romsdal, Riksantikvaren, Store norske leksikon og Norsk Teknisk Museum, som alle vil belyse ulike utfordringar knytte til bevaring og formidling av industrihistoria. Dagen blir avslutta med ei byvandring med vekt på Ålesund si industrihistorie.

Møbelindustrien i regionen
Andre dag (5. juni) går turen til Sykkylven, kjend som møbelindustrien sitt sentrum. Det blir føredrag på Møbelmuseet, bedriftsbesøk hos møbelprodusenten Ekornes og omvising i det historiske Tynes-bygget. Her får nettverket eit unikt innblikk i verksemder som har sett sitt preg på lokalsamfunnet og norsk industri.