Godkjenner fusjonar for Viti

Stiftelsestilsynet godkjenner fusjon mellom regionmuseet Viti, og dei lokaleigde musea Brudavolltunet og Møbelmuseet. - Med dette har vi samla fjorten eigarar av kulturarven til ein eigar og forvaltar av kulturarven på Sunnmøre og vi avsluttar no konsolideringa, seier Audhild Gregoriusdotter Rotevatn i Viti.

Viti har arbeidd med konsolidering sidan 2018 og konsoliderte Folkemusikkarkivet, Sunnmøre museum og Stiftinga Kulturkvartalet (Jugendstilsenteret og KUBE) i 2019. Siste ledd i konsolideringa var overtaking av fleire lokale museum. Tidlegare i år overtok Viti eigarskapen til Anders Svor-museet i Hornindal i Volda og Naturmuseet i Sykkylven.

Viti har no 13 arenaer og ein desentralisert struktur, men ein eigar og ein forvaltar av kunst – og kulturarven.

Med denne godkjende fusjonen har styret i Viti vedteke å avslutte det omfattande konsolideringsarbeidet. Viti har no på ein god måte sett oss i stand for å forvalte kunst og kulturarv på ein berekraftig måte for framtida, slik Stortinget har bede oss om. No har Viti utarbeidd ein langtidsstrategi for åsatse på dei flotte arenaene og fagområda vi har i Viti i åra som kjem, seier administrerande direktør i Viti, Audhild Gregoriusdotter Rotevatn.

Rotevatn vil framheve den gode, lokale innsatsen ved dei nye arenaene som kjem inn i regionmuseet.

Vi har hatt ein god dialog og eit framifrå samarbeid med dei frivillige. Vi har allereie hatt arrangement saman og fleire skal det bli. Ved å fusjonere har dei lokale eigarane tatt eit strategisk klokt val for framtida, der dei lokale samlingane vert ein del av det nasjonale museumsnettverket. Det er eit val som vil stå seg i eit generasjonsperspektiv, seier Rotevatn.

Viti er den største kulturinstitusjonen mellom Bergen og Trondheim med 45 tilsette og er eit konsolidert regionmuseum, med lokale, regionale, nasjonale og internasjonale oppgåver innan forvalting, formidling, forsking og fornying. Viti er ein del av Kystverkmusea og Rèseau Art Nouveau Network.