Båtbyggjar for ein dag

Borrevinde, okshøvel og klinkhammar! Verktøy som 110 elevar ved Volda VGS og 1850 elevar på 8-10. trinnet i Ålesund kommune skal teste ut saman med Viti. Med produksjonen «Båten og menneske» utforskar elevane tradisjonsbyggjing av båt.

Ut til skulane har vi med oss ein færing i full skala. Saman med båtbyggjarane Kamilla Apelseth Snemyr og Torstein Runde-Huus skal elevane forme båtbord med øks og høvel, klinke («sy») båtsaum og sette saman dei ulike delane i ein færing.

Kroppen som måleband
Båtbyggjaren brukar kroppen som måleband når han byggjer, og ungdommane får eit djupdykk i dei gamle måleeiningane famn, alen og fot. Menneskekroppen og vinden føre båten framover.

Snidbetningen
Den sunnmørske snidbetningen, færingen som er med oss på turné, er noko heilt for seg sjølv. Båtborda framme er lagt ut som ein plog som gir bredde i båten. Bakover smalnar den av som ein fisk. Båten har «eit stort hjarte», som passer godt til det asymmetriske råseglet og til å ta om bord ein stor fangst - slik ein god sunnmøring både skal og må.